More in: Transcription, Nursing, HOSPITALITY, Central Govt., BPO industry, Retail/Marketing
Monday, 28 December 2009 00:25
ZOMI CHRISTIAN FELLOWSHIP, BANGALORE
Ebenezer 11, Commisariat Road (Near Bangalore Central)
Bangaluru - 25, Karnataka, India
Ebenezer 11, Commisariat Road (Near Bangalore Central)
Bangaluru - 25, Karnataka, India
Ref.No:2009-10/ZCF-CCSC/01(Cor) Date: 27/12/2009
CHRISTMAS 2009 ZATNA REPORT
CHRISTMAS 2009 ZATNA REPORT
Amasa in Christmas 2009 nuamtak a hon zangsak leh I kipahpih uh Jesu Khrist min in Chibai. I lametna uh Christmas tungtawn a hon thaksak I Pathian Itna ziakin ZCF in Christmas 2009 lopna ding toh kisai a Christmas Sub-Committee in mohpuakna muangtak a nahon got uh bangin, tuni December 27, 2009 nitak 5:00PM in zatzoh hita hi.
Hiai hunsung in Biakna 5vei kinei a, Leenkhopna khatvei leh Mipi Annkuang Luina 1vei kinei hi. Biakna hun sehte ah A suanhuai leh Khalam a hon makaihtu I neih un Thutak Siangthou leh Challenging taktak “Darkness to Light” – Isai 9:2 pansan in hon gen uhi.
Date Min
06/12/2009 Rev Hangpi Manlun
13/12/2009 Pastor Thiankhanlal
20/12/2009 Pastor Tunson
25/12/2009 Rev Dr Pumzathang Tombing
27/12/2009 Pu Genlian Vaiphei
Hiai Program zatna ding toh kisai in Thumna, Sum-le-Pai, banah tha-le-zung it hetlou a I thohkhawm ziak uh ahihman in kipahthu Member tengteng kiangah Pathian min in ka gen a, ZCF Christmas Sub-Committee Minute Book ah KIPAHTHU Note ahi.
Tutung Christmas zatna ding toh kisai in a biktak in sum-leh-pai ah Toupa vualzawlna luanglet ahi chi in sum zatna leh senna ah muhtheih hi:
Christmas Thohlawm (every Second Sunday + Christmas Day a ki dong) : Rs. 28,500.00 vel
Christmas Thohlawm mi muanhuai te a kipan ki dong : Rs. 18,500.00 vel
Tulel a khut a om hidia gintak a val teng ahihleh Finance Secretary in hon sukfel chiangin Report a tuam in kahon paisak lai ding uhi. Vualzawlna hon pepa kua hihiam chih I haihkei uh chih I thilpiak dan ua kipan chiangtak in muhtheih in om hi. Mipi hon thohkhawm tengteng tungah kipahthu I gen a, Toupa’n a leh tamseem in hon vualzawl chiat ta hen.
Program zohni (December 27, 2009) tan in Sub-Committee in Meeting 4vei leh Joint Meeting (EBCC Bangalore Heutute toh) 1vei kinei hi.
BIAKNA HUNSEHTE A HUNZATDAN TANGPI LEH THUGEN TOMKIM
Advance Christmas 2009 | November 29, 2009 | 2:00PM to 5:00PM
Hiai hun ah Pastor Tunson in Christmas 2009 Program honkhiatna leh Pathian kianga piakkhiatna nei hi. Huan, Laa sasiam tuamtuam (Mimal leh Group) 11 a kipan Phatna Laa siamtak leh hingtaktak ngaihkhiat ahi.
Htp K Thangchinlal, Coordinator in Christmas Sub-Committee 2009 in Thupi “Darkness to Light” – Isaiah 9:2 tungtawn in chouna leh Mialna leh Vaak hinkhua Zomite tuma a kipan in genna nei a, hon puaklek sak mahmah hi a theih in om hi. Aman Pathian min a Setan Galdou dinga kisa chiat dingin mipite chialna nei a, mimal hilou a Pathian thahatna koppih dingin hasotna toh hun zou hi.
A biktak in Pastor’s Choir (Joy to the world) chihla sak in mipite lungsim hetkha mahmah in nuam leh thupi kisa hi. Amaute pina toh Phatkhawmna hiai Laa tungtawn in Lim leh nuamtak in kinei zuazua a, Tuazoh in Rev Hangpi Manlun in kipahthugenna leh hunkhakna nei hi.
Hiai Program zatzoh ahihin mipi kikupna tuh Christmas Program hipanta a, innla paiding te bangin kisikhuai sa mahmah ngei ding uh…chih suangtuahna lel ahi.
Christmas Program - I | December 6, 2009 | 3:00PM to 5:00PM
Hiai hun in Rev Hangpi Manlun in Thupi pansan in thugenna tai huai tak mai in honzang hi. Aman Jesu Khrist khovel a vaak honpuaktu ahihdan leh Laisiangthou a Assuria leh Naftali te a dinga Vaakna tungding pen Jesu Khrist tungtawn a tangtung ahihdan gen hi.
Huan, Khrist MIN tuamtuam te lakah a Lamdang ahihdan pianken, a hinkhua mahmah ah ahihdan gen hi. Khrist hinkhua Biakna mun mahmah a lamdang ahihdan genkawm in, kikhawm mite kiangah nang bangchibang in na lamdang hiam chih dotna ngaihtak mai bawl hi.
Lemguattu Jesu Khrist hinkhua leh nasepte pansan in hilhchetna chiangtak in gen nawn hi. Hinkhua a zumna I chihte Setan nasep ahihdan a mimal hinkhua pansan in lungsim khoihtak in gen hi.
Thukhitna dingin Mial Nasep tawpsan a Vaak thuam a kithuam dingin, leh Khrist a diktatna Vaak in a honsalhvak hunchiangin na maituah ngam diam?chih dotna toh hunzou hi.
Christmas Program - II | December 13, 2009 | 3:00PM to 5:00PM
Hiai hun ah Pastor Thiankhanlal in Christmas Message nuamtak leh lungkhoih huaitak in hon gen hi. Aman Jesu Khrist minte a nuaia bangin hon tangkou hi.
Mak – Danial leh Lawmte hinkhua ah lahna nei hi.
Lemguat – Mihing lemgelna leh Pathian lemgeelna tehkak in Lemguat siam ahihdan gen hi.
Pathian Hat – Pathian Hatna ama Ministry Experience pansan in a muhte genna nei hi.
Kumtuangpa – Kuamtuangpa ahihna Sam 90 a I muh uh bangin gen nawn hi.
Lemna Lal – Lei leh Van kikal a Lemna bawltu ahihdan leh Romete 5: 10 pansan in gen nawn hi.
Huan, Jesu Khrist mitengteng ngaidam dinga Leitung a hongpai ahihdan mi khat tanchin pansan in gen hi. Ngaihdamna a poimoh dan leh huai tellou a na thilpiak khempeuh Pathian mitmuhna ah a thawm hiding ahihman in, Khrist Hongpaina san phawkin Eite lakah Lemna Leeng hen chih toh hun zou hi.
Christmas Program - III | December 20, 2009 | 3:00PM to 5:00PM
Hiai hunin Pastor Tunson in Pathian Biakna ah nang leh mimal kal ahihman in lungkiat louhding ahihdan genin hasotna toh hun pan hi. Huan, Darkness chihleh Light thilnih a omkhawm theilou ahihdan Khristian Hinkhua leh Khovel dana leng dik ahihman in poimoh a sak thu gen hi.
Darkness: Isai 9:2 pansan in Assuria ten Jebulun leh Naftali Gamte a hihsiat dan uh leh Mialna Gam ahihdan uh gen hi. Huan, Isai Laibu pansan in Israel miten Pathian a manghilh man ua tuabang a Mialna amaute adia omsak ahihdan gen hi. Saltanna leh hihhaksatna amaute Ginatlouh man ahihdan leh Pathian thupiak a taisan ziak uh ahihdan gen hi.
Light: Jesu Khrist hongpianna in tua mialna hinkhua a kipan in Vaak muta uh ahihdan hon hilh nawn hi. Vaak toh kisai in Bible a experience mite lakah thum pansan in gen hi.
Astrologers - Jesu Khrist hongpian ding in amauten aksi lamdang muh uh a, Jesu hongpiang chih a theih un thilpiak toh va bia uhi. Vaaksak ahih un Herod thuhilhna hilou in Vaak theihsakna bangin kiklam in lamtuam, Amau khawlam ah paita uhi.
Shepherds’ - Amauten Angel thupiak leh Vaak ana mu uhi. Vapai in Naungek ava mu nawn uhi. Huchiin in tua tanchin tuh a genthang uhi.
St. Paul - Damaska ah Vaak in a salpuk hi. Tua Vaak in a houpihna pansan in Khrist tuh Hondampa dingin saangta hi. Huchiin a hinkhua tuh kheklamdang in omta hi.
Eite a dinga Gospel hongtung in Vaakna kum 99 paisa in kimuta hi. Christmas 99vei zatna ding ah bangchin na zatsawm hiam? Tua Gospel in Zomi Christian Fellowship te a dingin bang kikhenna hontun hiam? Chih leh Khrist bangkim a masasak dingin hanthawnna toh hun zou hi.
Christmas Program - IV | December 25, 2009 | 2:30PM to 4:00PM
Hiai hun Wesley Tamil Community Centre ah zat ahi. Lasaksiam mahmah hunkhop a kipan in Phatna Ngaihzoh ahihin Rev Dr Pumzathang Tombing in “Darkness to Light” chih pansan in Jesu Khrist hongpian a thiltung tuamtuamte leh Jesu Khrist Inntekna Khristmas chih thupi toh hun honzang hi.
Aman Jesu Khrist hongpianna tuh Pathian thupina ahihdan gen a. Jesu Khrist salam etdan a simmohhuai ahihdan; a hongpiandan leh khanletna munte gen in Vaak in a totkhakna mun tuh mun nuainung leh niampen ahihdan gen hi. Huan, Zomite hinkhua ah Kingaihniamna Kampau tel hinapi in lungsim taktak hilou ahihdan gen hi. Tua hihman in Khrist hongpaina I koppih theihna dingin a haksa mahmah kingaihniamna poimoh ahihdan naktak in gen hi.
Thukhitna dingin Mihing hinkhua khek lamdang dinga hongpai Jesu Khrist mimaltak ah nanga dingin a hongvak ta hiam? Tua Vaak na muh leh bang na loh a?…chih leh Commitment bawlthak dingin kuapeuh chial hi.
Hiai zohin ZCF Secretary leh Finance Secretary in Pastor-te leh Mi teeltuam Pastor 4+1 leh midang 15te kiangah Kipahthugenna, Pahtawina leh Christmas Gift chi in thilpiak piakkhiatna ZCF Bangalore Member tengteng sik-le-tang in hon nei uhi. Tuazoh in Hunkhakna Rev Hangpi Manlun in Thumna toh nei hi.
Leenkhopna: Hiai hun ah makaite pina toh Leenkhopna lim leh nuamtak in neih in om hi. Lametna hon hingsak Pathian pina toh huntom kisa hi, tua hih Pathian ompihna ziaka nuamlua ahihman ahi a, sana kuaman a kiton a hekhak ana kihilou hi.
Christmas Annkuang: GETS makaite hahpanna ziakin Limtakmai in mipi 350vel paikhawm ten vahtak chiatin Christmas Annkuang ki umkhawm hi. Nuam mahmah, lim petmah chihkan kamsiam in daihlou hi topmai.
Christmas Program - V | December 27, 2009 | 3:00PM to 5:00PM
Hiai hun in Adviser Pu Ganlian Vaiphei in Thutak annkuang luina nei hi. Aman Zomi context ah Darkness to Light muhtheih ahihdan tomkimtak in gen hi. Tua Gospel tungtawn a Vaakna I Gam a hongtung pen tuni in Hotdamna dinga zangkha mi nahihiam chih dotna liantak bawl hi.
Huan, Sawltak Paul hinkhua Vaak ziaka khek lamdang a hongom mah bangin hinkhua uah Vaak Jesu Khrist tungtawn a I muh un hontun hen chihtoh hun zou hi.
Huan, Christmas Sub-Committee a Secretary in Christmas Report tomkimtak in pia a, Rev Dr Pumzathang Tombing in Pathian min in Christmas 2009 khakna thumna toh nei in zatzoh hita hi.
I Christmas zatna uh toh kisai a kipahthu gending omteng gengen lai ding chileng a tam mahmah ding hi. A biktak in ZCF Member kuapeuh in I hihtheihtawp uh suaha I pankhawmna uh ziakin kipahthu Pathian min in kahon gen hi.
Christmas Program toh kisai a ka thukhitna dingin:
“Ngou tuisuah giat Laitui tangin, Tung a Vanpi Laipek tangin, Sing leh loute laikung tangin Lei mihing ten gelhchiat hen aw, Pathian Itna gelhseng lou ding”, chi in Laa gelhtu’n ana gelhmah bangin, Pathian Itna thupi dan a tunga Christmas 2009 hunsehte tungtawn a muhtheih a om manin, eite’n leng a Itna man bangchiin I pe thuk ding ua?
Chairman omlou ahihman in, ama sik-le-tang in:
I mai a om Kumthak 2010 hongtung ding eite a din Kumpha hong hi henla, kipahna thak hontun hen.
Na vak un KUMTHAK chibai.
H Thiankhanmuan
Secretary|Christmas Sub-Committee
Comments (1)
Write comment
You must be logged in to post a comment. Please register if you do not have an account yet.
| < Prev | Next > |
|---|
Laizom Tongsuah Aug 29
Christmas non matan bek I "message" te uh lungsim ah omthei leh maw...!!??