Zingkal khat office a pan ka pawt khiak a kipan ka lungsim khat thawm hau den hi, a ziak di ka ngaih tuah chiang in lah ka thei kei a ka lawm te khawng chiamnuih thutak a ka dot chiang in Tangval lai huchi thei mah hi, chiin hon chiamnuih zel uhi. Inn ka tun nung leng ka ihmu thei moh hial hi, Huchia ka ihmut theih vak louh toh chi in nitaklam dak 5:30 vel in ka lupna a pan thou khia hi, ka thoh nung sawtlou in Phualpi (Delhi) a om ka u te a kipan sms in Ka Nii damlou kha gim lo sim mah mah ahi chih ka za hi. A damlouh ka theih nung ni khat vel paisa phet ahi alungkiak huai sim hiveh aw hon chih beh lai hi. Hiai thu ka jak tak in hiai di jiak hin teh maw chi in ka ki lungmuang sak sim pah hi. Ann nek bang hong hun suk nawn ahih man in ken le ann nek a Office kai di dan ka ngaihtuah laitak in ka Paneu te khat in Ka Nii om louh lam phone in hon hilh hi. Ka ngaih tuah na hon sukha lo sim ahih jiak in kei le Office kai dia kisa lai ka tawp kik thak a ka heutu te ka phone leh "take your time" chih toh leave ka deih zah zah hon pe thei di ahih dan toh hon hilh hi.
Ka ngaihtuah na khat a Ka Nii hi a dam theih louh toh a hampha khat in ka ngaih tuah mawk mawk hi, Ka neu ua pan ka Gang(uncle) in a kep touh det ahi hi, a khenchiang bang in zingkal bang le thou zou lou sek ahi hi. A damlouh ziak in leng Vellore lam leng bangzah vei hiam ana zin khe ta uhi, himahleh tutung a damlouh dan uh ka ngaih tuah chiang in nidang bang lou tak in Malaria ahi chi a hilh in ka om hi. Inn lam a ten theih tawp suah a ana kem uh ahih chiah chiin in ka ki lungmuang sak hi.
Ka Nii damlouh dan leh Damdawi inn a kepdan uh ka kimchiang (detail) tak a ka theih in ka thangpaih tha a suak hi. Malaria a damlou himah leh a damlouh na dang tuam tuam te ziak a Quinine piak kha lauhuai pi hi chih kei sang in Daktol ten thei zo ding in ka gingta hi. Test bang mah a neih louh ziak uh ahi dia a Sin na le BP sang te ziak leh Diabetes te ziak in Tua a kimawk kep pen uh thil poi lua tamtak a sukha vek hi.. Bang jiak a hiai bang lawm lawm a hih khial tel di uh adiam aw, Negligence or Ignorance ziak ahi chih chuh a chiang khop mai hi, a koi zo pen ahi diam ah. Vaigam a Doctor leh Nurse te le bang pi hituan lawm lawm khollou uh eive, A khen a siam na uleh a zil dungzui un a siam zaw zo ommah tham uh e, hilehleng a taangpi thu a a zo kibang thou uh eive. A siamna uh a zat siam ziak ua muanhuai a himai diam ah...
I gam a Damdawi Inn te uh a Building leh lupna te uh zaw a hoih vek vuk din le ka koih kei him him hi, Kua teng hiam nekbang (kha teh nen) a kibawl ahih chiang a. Himahleh a sung a sem eimi, I chipih ngoih ngoih, Pathian thu awi tamzaw tham ngen gamtat na mun ahih ziak in ki nepna lian pi ka nei mawk hi, ka gin bang lou tak in kum 2004 a ka lawm te damlou ka va veh lai a ka mangngilh theih louh ka thil muh kon gelh tel zek ding, Ka lawmpa injection a hun tak ziak in Nurse khat a hong kap din hong kuan hi, a khut tak lam ngen a ana kikap khin a hih ziak a a veilam a kap dia a nget leh Nurse nu heh chih tak a heh mawk, hang bol bol, Damdawi inn a pa bawlsa hileh kilawm bang a hong om mawk, kilawm lah kasa lo sim a lah, pau leng naupang hon chi nuam di uh hizo mah lai hi. Hichi bang pi a ina ki kep dam zel pen uh zaw tunglam a pan huhna ahi ka chi lou thei kei hi. Gen beh lai leng, mun dang a te zaw a nasep ua a kipiak zoh ziak uhia ka thei kei, dam lou lai bang le ki dam hul hul leh kilawm bang ka sa phial hi. 2005 kum a Mizoram a Skulpu ka seplai in Khosik leh Sungkhoh in ka om hi, Ka school neitu te uh zinkal ahih toh chi in kihah pan sak in damlou sa sa in ka kuan tei tei sek hi. Huchia ni nih khawng ka kai nung in kei leng zingkhat lupna tung a pan thou zou lou in ka om hi, Ka seppih ten skul a etkai ngai ahih ziak in ka naupang ten auto khat la in kei leh ka naupang te khat toh Hospital zuan in ka kuan khe ta uhi, Damdawi Inn ka tun un Doctor ten hon en pah ua ka sisan test din a lakhia pah uhi, Ka natna leh a kipat dan vel hon dong ua kei mizo pau siam nailou (a gen teng uh chu theita, pau siam nailo) ka hih chiang in siam leh siam louh chih om lo in Sappau in ka ki hou uhi. Huai banah ka om na uh Hospital a puah lai tak uh ahih man in Kei chauh kha a In-patient neih sun uh ka hizomah hi. Ka dam louh na a sui khit un test result tungtawn in hon enkol ua, huai mun ah nitam leng om a ngai kei bok hi. A sung a sem te a kam siam ua, Ann nek di lah a hun hun a hong pia uh, Inn lam a om te a dia buai huai lou, a man uh leh hong veh uh a man kei uleh le Poise lou.. Thoveng zaw ki hi mai. Damlou a I hong lup hial leh zaw damdawi kipiak a ki hang san sang in kamsiam a tuilum kipiak le kidam pih zaw leh kilawm khop le ka sa mai. I gam a damdawi inn te chu a damlo te a di ann muhphak a le om ngei lou, a om sun te le nek ngam huai lou phial khop a botloh. A min pu ngen a om mai mai ahi chi leng khial din le ka ki koih kei. Kua te hiam sepna om theih nang a a minpu mai mai ahi chinuam dan keive.
Huchia hiai thil neng neng te ka ngaihtuah khit in mi va hichi mohsak mawk chih na lungsim ka nei hi, himahleh huai nung sawt lou in Ka Pi. Vung omlouh thu ka za nawn hi. A damlouh na Malaria PF hiloupi Malaria PF in hoh ngohsak ua, treatment a piak ua kipan hong chau hul hul in azing in Damdawi inn ah hon sihsan ta hi.
Akhonung a i theih thakleh Malaria PF hiloupi Laboratory te hihkhelh ana hi maimah a, a zing mahmah a District Malaria Officer pa ava etsak uleh Positive Malaria PF chih kigelhna mun ah FALSE POSITIVE chih ana gelhsak maimah. Bangteng hileh Ka Pi ittak chu vuiliam in a omta hi. Hon omlouhsan ziak chu Doctor te wrong diagnosis ahi pen hi. Ka innkuan sung ua hichi bang thil tung ahih leh I zomi pih niteng a damdawi inn a honna omlouh san te ka lungsim ah hong lut pah hi. Misi 10 omna lak a hihkhelh ziak a si bang zah a om dia chih ngaihdan hon pe mawk ahi. Ngaihtuah mah dih uh? Ngaihtuah ve ua I gam dinmun uh, Ka Insung ua thiltung heh tawk in bang tawk leng le ka hih theih om lou, dikna gen di chi leng le ka lam a pang di mi ka neih ngai dia, ka neihsa in lah a chin kei a, huchiin ka dikna tangkou pih tei tei di chi leng Chini Bag tampi ka neih a ngai dia, a poimoh le Khe 4 nei ka kaih puk mel le kuan a thei a. Ka hih theih om sun chu ka tut mun a ka khitui ka nul louh ka hih theih a om kei hi. Gam leh nam iit chiin I ki Zogam neisak thei mah mah ua, Gam leh nam iit I chih chiang in Gamnuai a khosa te chauh gam iit hi tuanlou, I nasepna ah ginom tak in I mi te a adia phattuam in nasem le Gam iit ki hi pan di ahi. A leitang zaw iit huai pen a hi kei a bei thei di le hikei, A mi te ki iit tuah in sem phot le, gin om takin, Zogam I chih le gamla lo ken chia....
| < Prev | Next > |
|---|
Laizom Tongsuah Aug 29